မေသျှံ ဟာ ရုံးခန်းတစ်ခုမှာ အလုပ်လုပ်နေတဲ့ ရိုးသားတဲ့ အမျိုးသမီးလေးတစ်ယောက်ပါ။ သူမရဲ့ လုပ်ဖော်ကိုင်ဖက် မနု ကတော့ အမြဲတမ်း တစ်ပါးသူကို အတင်းပြောတတ်ပြီး မေသျှံရဲ့ အလုပ်တွေကိုလည်း “ဒါ ငါလုပ်တာ” ဆိုပြီး အထက်လူကြီးဆီမှာ နာမည်ကောင်းယူလေ့ ရှိပါတယ်။
တစ်နေ့မှာတော့ မနုက မေသျှံ မသိအောင် သူမရဲ့ ကွန်ပျူတာထဲက အရေးကြီးတဲ့ ဖိုင်တစ်ခုကို ဖျက်ပစ်လိုက်ပါတယ်။ အဲဒီဖိုင်ဟာ နောက်နေ့ အစည်းအဝေးအတွက် အလွန်အရေးကြီးပါတယ်။ အစည်းအဝေးမှာ မေသျှံ အရှက်ကွဲပြီး ရာထူးက ပြုတ်သွားစေချင်တဲ့ ရည်ရွယ်ချက်နဲ့ပါ။
မေသျှံဟာ ဖိုင်ပျောက်သွားတာကို သိလိုက်တဲ့အခါ အရမ်းဝမ်းနည်းပြီး ဒေါသထွက်မိပါတယ်။ လောကီပုံစံအတိုင်းဆိုရင် “သူ့ကိုလည်း ငါပြန်ဒုက္ခပေးမယ်၊ အထက်လူကြီးကို အကုန်တိုင်ပြောမယ်” ဆိုတဲ့ လက်စားချေလိုတဲ့ စိတ်က တဖွားဖွား ပေါ်လာပါတယ်။
ဒါပေမဲ့ မေသျှံဟာ ခဏလောက် ငြိမ်သက်ပြီး ဆုတောင်းလိုက်ပါတယ်။ “လောကီပုံသဏ္ဌာန်ကို မဆောင်နဲ့” ဆိုတဲ့ စကားကို သတိရပြီး သူမဟာ လက်စားချေမယ့်အစား အလုပ်ကို ညလုံးပေါက် ပြန်လုပ်ဖို့ ဆုံးဖြတ်လိုက်ပါတယ်။
ထူးဆန်းတာက အဲဒီညမှာပဲ မနုဟာ ရုံးကအပြန် လမ်းမှာ မတော်တဆဖြစ်ပြီး ဆေးရုံတင်လိုက်ရပါတယ်။ သူမရဲ့ မိသားစုကလည်း နယ်မှာမို့ ဘယ်သူမှ လာမကြည့်နိုင်ကြပါဘူး။ ရုံးကလူတွေကလည်း မနုရဲ့ အကျင့်ကို သိကြတော့ “သူ့အကုသိုလ် သူခံတာပဲ” ဆိုပြီး ဘယ်သူမှ သွားမကြည့်ကြပါဘူး။
မေသျှံဟာ ပင်ပန်းနေပေမဲ့ မနုအတွက် စိတ်မကောင်းဖြစ်မိပါတယ်။ သူမဟာ အစားအသောက်တွေ ပြင်ဆင်ပြီး ဆေးရုံကို သွားကြည့်ခဲ့ပါတယ်။ မနုဟာ မေသျှံကို မြင်လိုက်ရတဲ့အခါ အံ့သြသွားပြီး မျက်နှာပူသွားပါတယ်။
“မေသျှံ… ငါ နင့်ကို အများကြီး ဒုက္ခပေးခဲ့တာ။ အခုလည်း နင့်ဖိုင်ကို ငါဖျက်ခဲ့တာပါ။ နင် ငါ့ကို ဘာလို့ လာကြည့်တာလဲ?” လို့ ငိုပြီး မေးပါတယ်။
မေသျှံက ပြုံးပြီး “ငါလည်း လူသားမို့လို့ စိတ်ဆိုးမိတာပေါ့။ ဒါပေမဲ့ ငါ့ဘုရားက ငါ့ကို သင်ပေးထားတာက ‘ရန်သူကို ချစ်လော့’ တဲ့။ လောကကြီးကတော့ အပြန်အလှန် ရန်လုပ်ဖို့ သင်ပေးပေမဲ့ ငါကတော့ မေတ္တာနဲ့ပဲ တုံ့ပြန်ချင်လို့ပါ” လို့ ပြန်ပြောလိုက်ပါတယ်။
အဲဒီနေ့ကစပြီး မနုဟာ လုံးဝပြောင်းလဲသွားပါတယ်။ မေသျှံရဲ့ “မတူညီတဲ့ အသက်ရှင်မှု” က မနုရဲ့ ခက်ထန်တဲ့ နှလုံးသားကို အရည်ပျော်စေခဲ့ပါတယ်။